يسبق كلامنا سلامنا يطوف ع السامعين معنا
عصفور محندق يزقزق كلام موزون و له معني
عن الارض سمرا و قمرا
و ضفه و نهر و مراكب
و رفاق مسيره عسيره
و صوره حشد
و مواكب
ف عيون صبيه بهيه
عليها الكلمه و المعني
***
مصر يا امُه يا بهيه
يام طرحه و جلابيه
الزمن شاب و انتي شابه
هو رايح و انتي جايه
جايه فوق الصعب ماشيه
فات عليكي ليل و ميه
و احتمالك هو هو
و ابتسامتك هي هي
تضحكي للصبح يصبح
بعد ليله و مغربيه
تطلع الشمس تلاقيكي
معجبانيه و صبيه
يا بهيه
***
الليل جزاير جزاير
يمد البحر يفنيها
و الفجر شعله ح تعلا و عمر الموج ما يطويها
و الشط باين مداين
عليها الشمس طوافه
ايدك في ايدنا
ساعدنا
دي مهما الموجه تتعافي
بالعزم ساعه جماعه
و بالأنصاف نخطيها
***
مصر يا امُه يا سفينه
مهما كان البحر عاتي
فلاحينيك ملاحينيك
يزعقوا للريح يواتي
اللي ع الدفه صنايعي
و اللي ع المجداف زناتي
و اللي فوق الصاري كاتب
كل ماضي و كل أتي
عقدتين و التالته تابته
تركبي الموجه العفيه
توصلي بر السلامه
معجبانيه و صبيه.. يا بهيه
***
و يعود كلامنا في سلامنا يطوف ع الصحبه حلواني
عصفور محني يغني
علي الأفراح ومن تاني
يرمي الغناوي تقاوي
تبوس الأرض
تتحني
تفرح
و تطرح
و تسرح
و ترجع تاني تتغني
اللي بني مصر كان في الأصل حلواني
