جيفارا مات
جيفارا مات
اخر خبر في الراديوهات
وفي الكنايس
والجوامع
وفي الحواري
والشوارع
وع القهاوي وع البارات
جيفارا مات
واتمد حبل الدردشه
والتعليقات
مات المناضل المثال
ياميت خساره علي الرجال
مات الجدع فوق مدفعه جوه الغابات
جسد نضاله بمصرعه
ومن سكات
لا طبالين يفرقعوا
ولا اعلانات
ما رايكم دام عزكم
ياانتيكات
يا غرقانين في المأكولات
والملبوسات
يا دافيانين
ومولعين الدفايات
يا محفلطين يا ملمعين
ياجيمسنات
( جمع لاسم جيمس بوند بالدارجه المصريه )
يا بتوع نضال اخر زمن
في العوامات
ما رايكم دام عزكم
جيفارا مات
لاطنطنه
ولا شنشنه
ولا اعلامات واستعلامات
**
عيني عليه ساعه القضا
من غير رفاقه تودعه
يطلع انينه للفضا
يزعق
ولا مين يسمعه
يمكن صرخ من الالم
من لسعه النار ف الحشا
يمكن ضحك
او ابتسم
او ارتعش
او انتشي
يمكن لفظ اخر نفس
كلمه وادع
لجل الجياع
يمكن وصيه
للي حاضنين القضيه
في الصراع
صور كتير
ملو الخيال
والف مليون احتمال
لكن
اكيد
اكيد
اكيد
ولاجدال
جيفارا مات
موته رجال
ياشغالين ومحرومين
يا مسلسلين رجلين وراس
خلاص خلاص
مالكوش خلاص
غير بالبنادق والرصاص
دا منطق العصر السعيد
عصر الزنوج والامريكان
الكلمه للنار والحديد
والعدل اخرس او جبان
صرخه جيفار يا عبيد
في اي موطن او مكان
مافيش بديل
مافيش مناص
يا تجهزوا جيش الخلاص
يا تقولوا علي العالم خلاص
