المرجيحه

يا عم ادريس
ياعم ادريس
يا بو المرجيحه والقواديس
ما جاش الدور ¿
عشان يطلع قادوسي لفوق
أبوس النور وأطفي لعلالي شوقي
وأغني في الهوي موال
علي ورد الخدود والخال
وادوق الحب سحر حلال
وأشوف الدنيا
وأبقي عريس
ياعم ادريس
ياعم ادريس
ياعم ادريس علي الدور
أدور وأطلع مع الطالعين
كفايه سنين ياعم ادريس
ياعم ادريس
كفايه سنين
وأنا وعيال
كما العصافير
رفاقه كلنا وفرافير
يا دوب يعلا الجناح بينا
يعدينا القادوس ويطير
ونرجع تاني لأفراحنا
ولا عرفنا الطريق من فين
وجينا
زي ما رحنا
حياري ومحرومين لاتنين
نداوي بالغنا جراحنا
ونرمي اللوم علي الجناحين
وجرح النفس له وجعين
يبكي القلب
قبل العين
وقاضي الحظ له شرعين
لاهل البخت ... والمتاعيس
ياعم ادريس
ياعم ادريس
وأه لو بختنا يشوفنا
ونرمي الزهر يدينا
وقاضي الحظ ينصفنا
ويحكم بالامل لينا
ونتمرجح علي كيفنا
وينساب القادوس
بينا
يا خدنا بعيد ويحدفنا
وعند الشمس يرمينا
علي بحر النسيم نسبح
وتسرح فيه أمانينا
وفوق شط النجوم ننزل
وترسي هناك مراسينا
ويبقي الجو هليله
تلعلع فيه
غناوينا
ونبدر
في الفضا حبه
غناوي
كلها محبه
تقول للهم يتخبي
وترقص في الهوي الفوانيس
ياعم ادريس ياعم ادريس