زعرب افندى اسما الله عليه
قرر يغسل مره ايديه
شفت الميه تهرب تشكي
كل صابون الدنيا ما يكفي
زعرب افندى جه فى رمضان
قام و أخدني بالأحضان
جاي يسألني يدفع بالأحضان
جاي بيسألني يدفع كام ؟
صدقة ماله بس حلال !!
قلت يا سيدى الدفع علينا !!
و انت كفايه القبض عليك !!
نظرة عينه بتقول ليله
أحمر و اسود زى الطين
عايز يمشى زى الدين
عايز يدفع للمساكين
خايف أقوله يزعل مني
أن زكاته زى صلاته
زي صيامه أو دعواته
هى صحيح كلها مفروضه
بس يا زعرب مش مقبوله !!
بص و قالي :ــ
بينى و بين الرب عمار
ياما دعيت له أنا ف الزار
ليه تحبكها و تعمل انك
بينى و بين الرب ستار
قلت يا زعرب : طهر ايدك
بطل كل الناس تدي لك
قالي : يا جينتل ، افهم حالي
عمر الماده ما تشغل بالي
أنا ف مكاني ناس جايه لي
جايبه هدايا مش على بالى
جت برضاها مش بمزاجى !!
يبقى رضاها طهر مالي