تاهت خطاوي الحياه
تاه الطريق
تحس لحظات الأمل
تلقي الحريق
خطوه بتعزب برئ
ينطفي نور العيون
يزداد ظلام
النفوس تنام بحيره
غيره و ألام
دمعه بقلبي الحزين
و أهات أنين
الطنين جوه الودان
المسدودين
الرحمه ضاعت بالمكان
مات الحنين
ضاعت قلوب أتغيروا
و يا اللي كان
شجره حياه متفرقه
فين الأمان
الضحكه باينه بالوشوش
مرسومه جوع
سهم بضهرك يمنعك
قتل بشروع
الدنيا مليانه حكاوي
و الأخ باع
الأبن باع الوفي
و النبض ضاع
الحب معروض و بنشتريه
و حجر أمي مش لاقيه
الكدبه باينه في الزمان
متلزقه في كل البيبان
و الأدين متلونين بارود و موت
و الحزن علم في البيوت
حريق دمار بركان و نار
الضمير مات في القرار
متشربه قلوبنا المرار
و لسه مش شايف نهار
صرخه مكتومه طالعه يا دوب
صرخه بتبكي تدمي القلوب
و لسه بحجاره بنحارب بطوب
العيون مبرئه بره الجفون
و الشر باين ضحك بجنون
عيون تبص مستغربه
ساكته شا يفه متقربه
خايفه مرعوشه متكهربه
أصوات بيدبحها السكوت
جدران غزلها العنكبوت
رنين بيدوي بالسراب
و الجسم مردوم بالتراب
يتولد كره و عزاب
و الليل بيندهنا بخوف
من غير كسوف
نرتعش من غير خيال
و الجنون رحله في بال
الأمل ضايع في ورطه
و السدود لسه بتوطي
جامده الأسيه
متنهده كل الصدور
النوه لفه
في البراري و البحور
الشمس تخدع بالدفي
و البرد قاسي
الأرض نزرعها بشوك
ماشي و حافي
و الجسم ينزف في المكان
يروي العيدان
زرع مخدوع في الغيطان
تشبع بطون المحرومين
أجسام نحيفه و دبالانين
عضام طريه مكسحين
أصوات ضعيفه و مهزوزين
شفايف مشلولين مقطوع اللسان
الميه زايده بغدر الطوفان
متعلقين بادين غريق متحيرين
و مافيش طريق
مكسوره العنين متغمضين
السواقي دايره و منساقين
الريق و ناشف عطشانين
و الرجلين متسلسلين
متشرقين متغربين
مشدودين متمزقين
و اللحم مرمي للكلاب
ينهشوا فيه الدياب
غربان و متدربه تخطف تحوم
حيه في عتمه جايه بسموم
و النياب لسه عطشانه لدم
الطحونه ماشيه بتقطع تلم
سنان متلونه بدم الضحيه
تاكل تضحك قاسيه قويه
ما يهمهاش انك تعيش
تبلعك لحم و ريش
بمكر تكدب تخدعك
تمشي بطريقك تمنعك
القوه سايده بالوجود
و الملك زايل
دايره مقفوله الحدود
الحال و مايل
الرصاص لعبه جنود
ظلم و هوايل
مصنوعه كل الجرايم مترتبه
أجسام بيها الألم متعزبه
و العجله دايره
متكسره كل التروس
تايه و حايره
تنحني رقبه و روس
الحكم تايه و القضيه
تدبح مش مستحيه
كل الحقايق متداريه
كلمه بمدفع و بندقيه
الفران تجري في جحور
خايفه تواجه أي نور
المشكله بقلبك تقاوم
المساله مافيهاش تساوم
قولها قويه و تكون بحق
جرس الخطر أنذر و دق
الموت نهايه كل فاجر
رب الوجود موجود و قادر
ينكشف خاين و جاني
و الحكايه أحكيها تاني
فيها النصر و الأماني
و الزمان يكون زماني
الأمل تشفي الجراح
و الفجر ينده بالصباح
