قلب مخلوق من دهب
يمكن لأنى بتلقائيه وقلبى حس
عديت بإيدى ع الجراح
وبدأت أجس
ووقفت جواكى النزيف
عديت حدودِك
عديت بإحساسى العفيف
لكنى أول ما اصطدمت بعنفوانِك
حسيت ف قلبى بشئ مخيف
حسيت بإنى
برغم إصرارك ضعيف
ولإنى أول مره أحس
بأن قلبى بيبتدى
يفتّـح لضيف
وبرغم إحساسه اللى أول مره
جايز
أعترف بيه شئ نضيف
وبرغم إن الدنيا قامت
ضدى وإتخبطت كفوف
وبرغم كل اللى انكتب
عنى وعنـِّك من حروف
وبرغم إن الحب أعمى
وأن أنا بالذات كفيف
صدقينى بقيت بشوف
إن غدرك أقوى منى
وانك انتى إخترتى إنك
تندمى فى البعد عنى
وبدون ما تعترفى بسبب
بعتى قلب حقيقى حبك
قلب مخلوق من دهب !!!