السلام عليكم .. مجرد رأي كلام من قلبي .. عناوين تايهه .... عناوين تايهه وغناوي من غير ألحان سنين مساكين عاشقه البراهين والأيام العايشه فْ حيره بين جدران العمر المايله وحواري شرايينها ظلام ليلها أنين وعيونها غيلان مش باقيه عالعيش والملح داست علي أطلال الجيره زرعتها أوتاد في غيطان مش عايزه برهان ولا شرح ونبضاتها في القلب أسيره بتعاني من قسوه وكدب وتوهان العقل المكبوت وتعاتب في الروح الساكنه وشموس الحلم المخنوقه بتصرّخ من كتر أهاتها من داخل أعشاش البوص وجيرانها عميانه وطارشه بتداوي في بواقي الجرح الساكن جدران العشه والفقر اللي كتير يتلصص وعيون العصافير تـتبصص التايهه من كتر الخوف وبْـتلمح علامات الموت متفصّل بمقاس مخصوص والكلمه اللي مافيها حروف قايمه تـْهاتي عايزه أهاتي وتهاجم دايما وتقاوح ولاتيجي فْ لحظه وتسامح تتباهي بعلوْ الصوت والنبوت ينزل مايخيّب ع الأمل الزايغ في عيونّا المسجون دايما في جْـنابنا وبيسقيه الكاس بمرار والنبته اللي ساكنها خضار تتـّاوب من كتر سكاتها بين حوّال الزمن التايه العطشان بين الشطين إن جت تشرب ويّا اخواتها تلقي الميّـه بطعم عكار صيفها حزين ساكنـُه شيطان كل حياته مغني وزار مابيسمعشي حتي أدان إمته يابكره تيجي وشايل أي جديد غير البركان والنجمه التايهه في سماك تلقي طريق مفتاحه معاك ساعتها نحاول نرجع تاني ، نعيش وياك من لحظتها هاتبقي تاريخ واحنا أكيد نبقي العنوان .........
