فى كل أزمة
فى كل لمة
بنلعن ف مصر
الحق ضاع
الخِل باع
بنلعن ف مصر
ظلم البشر
حكم القدر
بنلعن ف مصر
فسد الكبار
غلط الصغار
بنلعن ف مصر
اتهنت بره
أو تهت مرة
بنلعن ف مصر
***
و إيه ذنب مصر ؟
و إيه يعنى مصر ؟
مش مصر إحنا
حكامها إحنا
و الشعب إحنا
و ان كنا لعنة
أو كنا محنة
مصر الضحية
و إحنا دبحنا
***
حكامنا منِّا
و إحنا منهم
حكامنا ويلنا
و إحنا ليلهم
*
مين اللِّى جابهم
طب مين سايبهم
و مين يا خلق
بيدارى عيبهم
و مين حكيمهم
و مين وليدهم
و مين بيركع
و يبوس ف ايدهم
و ليه ندينهم
و نعيب ف ندينهم
لما يطاطوا
لظلم سيدهم
ركعوا و ساقونا
و سقنا غيرنا
لازمك ياراعى
غنم تسوقهم
***
حكامنا منِّا
و إحنا منهم
حكامنا منِّا
و عيبنا عيبهم
*
حاكمنا فرد
و رأيُه عرض
و اللِّى يمسه
يتهَّـد هــــدّ
و الفرد حاكم
مافى غيره فاهم
و اللِّى يخالف
تبع البهايهم
*
حاكمنا زوَّر
لجل يطوَّر
و الشعب ثار
و إدالنا منظر
و راح يدور
على حد اكبر
يعمل له واسطة
و دى مش مغالطة
ده شىء مبرر !!
*
حاكمنا شقلط
بعديها خطط
سابها لربه
مؤمن مِفنَّط
و الشعب ماشى
و كإنه ناسى
إيه اللِّى عاوزه
أو إيه مجاشى
***
حكامنا باعوا
و الكل باع
حكامنا بانوا
و إحنا بقناع
*
باعو الوطن
نسيوا المحن
و فوق كراسى
صابهُم عفن
و انا و انت يلاَّ
نهرب لبرَّه
لبلد نضيفة
و نلِّم عمله
*
حكامنا ساسوا
نهبوا و هاصوا
قانون يلبِّـس
كل اللِّى قاسُه
و انا و انت مالنا
إحنا ف حالنا
شغل السياسة
سبناه لغيرنا
*
حاكمنا حذر
اوعاك تفكر
ليه العقل يكبر
فى بلد صغير
قلت و ماله
عقلى ده حاله
و بعلم ابنى
يلغى دماغه
و دماغ عياله
***
و ليه نفكر
عارفين مانقدر
ف يوم نغيَّر
و لاَّ نطور
بلدنا باظت
واحوالنا مالت
حد يعــدَّل
و إحنا نساند
طب حد يبدأ
و أحلف و أصدَّق
حمشى وراه
و اهتف و ازعق
و ان طاله شر
حجرى بفخر
و اصرخ بقهر
ملعونة مصر
ملعونة مصر
و إيه.. ذنب مصر ؟
