أنا مصرى وفوق أى نقد
و ذكائى فاق حد الحـــد
جدى بنالى بعلمه المجد
و أنا بنيت المجد الكروى
*****
أنا مصرى و بحب الدوشة
و بركب دش على العشة
و العتة بتسرح فى الفرشة
و موبايلى أنغامة بتسرى
******
أنا مصرى و بفهم فى الإنشا
و بحب أفتى و أنا بتعشى
و بطّلع النكتة الروشة
و اتريق على نفسى فى شعرى
*******
أنا مصرى و احب النظام
تقول ورا رح آجى قدام
هى البلد دى فيها احترام
يا خويا اتنيل واجرى
******
أنا مصرى و احب الهتافات
و صوتى يعلا ف الأزمات
بشوال غناوى و حفان شعارات
و كفاية نعلا بصوت غجرى
******
أنا مصرى و بقدر أعيش
معايا و لّا ما معاييش
ما فيش حرير أهو فى الخيش
و أهو كله بيدارى ظهرى
*******
أنا مصرى و بصبر على المر
يشهد عليا تاريخ القهر
وان طال ليلنا
أقول يا خالقنا
يلا بقى إأمر بالفجر
و انام و أشد الغطا على خصرى
********
تأليف : هاله احمد الزقم
# موثقة بالشهر العقارى #