بعشق خريف اسكندرية
و ريحة البحر و شطوطها
و الليل و ساعة المغربية
و همس الفجر لبيوتها
و مين فى الدنيا دىّ
فى غلاوة اسكندرية
دى طيور الشمال فى سماها
بتغنى و تعشق دفاها
و تحزن وقت ما تفوتها
و لما السحابة تخبى
الشمس بين أحضانها
بلاقى ابتسامة قلبي
تمسح هموم أحزانها
و لحظة فراقنا بشوف
موج البحر الحزين
بينده بصوت ملهوف
و يقوللى رايح فين
و لما اللقا يجمعنا
لو حتى فى الأحلام
بيبقى الزمن له معنى
و بتضحك الأيام
بعشق خريف اسكندرية