عاصف ريدك هاتف شوقك .. رن .. وكف حس العارفك .. قلب الريد لى ردك خف *** داعي الشوق .. أم حادي الإلفة !؟ ولّا مجرد عشرة وعرفة ولّا البينا الما سامنو .. وخايفين منو و جد بستاهل مننا وقفة ولا أسيبك .. تاخدي نصيبك خوف من بكرة .. وقلة عرفة قولي الحاصل .. ويلا نواصل وأنا مستني .. الرد بى لهفة *** أنا بى شوقك .. حاسي وعارف وزيك شايل الريدة معارف ومن احساسي البي .. ما خايف أيه لو شلنا البينا نجازف وألف مبرر للما عارف *** تحكي عيونك كل الحاصل وأنا حاسيه مره تعاند .. و مره تكابر و مره تغالط حالها الفيهو وانتي مصرة .. تخبي الغالي وكل العالم بحلم بيهو وحبل الصبر البينا مواصل رغم الحاصل .. أنا ماديهو عاصف ريدك فكى طريقو خليه يصحي النام شاديهو