المستخدمين
المستخدم:
كلمة السر:
المنتديات اتصل بنا تسجيل الرئيسية
 
Your Ad Here
شاعر الأسبوع
شاعرة الأسبوع
قصيدة الأسبوع
أخبار وأحداث New
أمير الزمان
من ديوان ابرز تنجز للشاعر على محيلبه

 أمير الزمـــــــــــــــــــــــان
 
هي ايه حكاية الجماعه
في الجرايد و الاذاعه
كل يوم نسمع اشاعه
فيه أمير من غير اماره
يفهم اللعبه بشطاره
مد ايده لكل ايد
التقاها في الطريق
مد ايده للقريب
و الغريب
يقتل الفقر بكلامه
يمسك الخير من لجامه
صحا قلبي من منامه
قلت يمكن مش فاكرني
قال لي : فاكرك
قلت يمكن مش فاهمني
قال لي : فاهمك
قلت له تيجي معايا
ننسج الحب في روايه
قام ضربني على الخدود
قلت أشكيه للجدود
قام سبقني بالورود
غصب عنهم
غصب عني
التقيت نفسي أسير
التقيت نفسي في جماعه
قالوا عني في الاذاعه
التقينا في يوم وساعه
شاب بيروج اشاعه
فيه أمير لونك يا نيل
تلتقيه في كل جيل
تحت أشجار النخيل
يبني لينا سد عالي
من التهاني و الأماني
يزرع الصحرا في ثواني
و السحاب فوق كل بيت
و القلوب بتقول ياريت
الفقير يبقي له بيت
زي بيت كلب الأمير
و الأمير يولد أمير
و العبيد تفضل عبيد
و الجريمه ناقصها جاني
مش أنا و لا حد تاني
خفت منه لو لقاني
يتهمني أني جاني
قلت أشكيه للجدود
قام سبقني بالورود
غصب عنهم
غصب عني
التقيت نفسي أسير
التقيت نفسي في جماعه
قالوا عني في الاذاعه
التقينا في يوم وساعه
شاب بيروج اشاعه
فيه أمير فوق البحار
عمره ما شاف النهار
يقتل الشمس في شروقها
و في غروبها
يمشي و تلعب به الرياح
و النباح
و الشراع من كل لون
اتجاهه من أي موج
من الشمال
أو من اليمين
المهم الموج يعدي
هو ده معنى التحدي
و السفينه تجري بينا
هاربه من نور المدينه
فايته صوت حلو ينادينا
قلت يمكن مش سامعهم
قال سامعهم
قلت يمكن مش فاهمهم
قال فاهمهم
قلت حاسب دي النهايه
قال اي : اخرس دي البدايه
قلت أشكيه للجدود
قام سبقني بالورود
غصب عنهم
غصب عني
التقيت نفسي أسير
التقيت نفسي في جماعه
قالوا عني في الاذاعه
التقينا في يوم وساعه
شاب بيروج اشاعه
فيه أمير جنب الحدود
اشتغل تاجر بارود
باع في أرضي
باع في عرضي
و اشتكيته للجدود
قام سبقني بالورود
قالوا سامح
قلت أسامح
قام ضربني على الخدود
و انتهيت بره الحدود
قالوا : مصري
قلت : مصري
قام سحب مني الجواز
و اتهمني بالانتهاز
و اتهمني بالتمرد
و التقيت قلبي في تشرد
قلت أشكيه للجدود
قام سبقني بالورود
غصب عنهم
غصب عني
التقيت نفسي أسير
التقيت نفسي في جماعه
قالوا عني في الاذاعه
التقينا في يوم وساعه
شاب بيروج اشاعه
فيه أمير من عهد تاني
صورته كامله في خيالي
يعشق النور و النهار
قلبه حب لكل دار
يكره الفقر في عيوني
يكره الظلم في عيونهم
يسمع الشكوى فى قلوبنا
يسمع النبض في قلوبهم
لما يتكلم بداله
النهار وياه جميل
و القلوب وياه تميل
نبضه مني
صوته مني
هو مني
كأني هو
لونا واحد
توبنا واحد
صوتنا واحد
القلوب وياه تقول
بكره أحلى من اللي فات
و اللي مات يمكن يعود
قلت أسبق للجدود
و الطريق مليان ورود
و العمل فوق الوعود
و الأمل تاني يعود
في الجرايد و الاذاعه
شئ حقيقي مش اشاعه
الخلود مش للأمير
الأمير حتكون له ساعه
الخلود ويا الجماعه
النهارده و كل ساعه
 
 

شعر الفصحى
شعر العامية
شعر الأغنية
الشعر الجاهلي
الشعر الإسلامي
الشعر العباسي
الشعر الاندلسي
الشعر النبطي
شعراء الطفولة
المرآة الشاعرة
دمــــوع لبنــان
المونولوج والفكاهة
فن الدويتو
مواهب شعرية
علم العروض
قالوا فى الحب
 
البحث
 
كلمة البحث:
بحث فى الشعراء
بحث فى القصائد