ناقص الصابون و الزيت
و الأبره ويا الخيط
حتى الخضار ف الغيط
حتى الصفار ف البيض
و الضحكه جوه البيت
لا شكيت و قلت ياريت
و لا يوم انا مليت
ناقص الامل ف القلب
و الحب عند الكلب
و الفقر يقتل شعب
الطفل ويا الشاب
لا شكيت و قلت ياريت
و لا يوم انا مليت
ناقص الدوا
ناقص الهوا
حتى النخيل طارح نوا
و المر طايب و استوى
ويا الهوى قلبى انكوى
لا شكيت و قلت ياريت
و لا يوم انا مليت
ع الصبر أنا لفيت
و سرحت و اتمنيت
و القلب قال ياريت
الحب يجى البيت
يستقبل الأفراح و يودع الأتراح
و الفجر بعد غياب
نفتح عشانه الباب
و نقابله بالاحضان
دا الحب لو ف البيت
و الهمه لو ف الغيط
حتداوى كل عليل
و الحب ف المواويل
و القعده جنب النيل
محلا ليالى زمان